ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានណែនាំឱ្យប្រពន្ធ័ផ្សព្វផ្សាយ ត្រូវចូលរួមថតផ្សាយពីដំណើរ ការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះឱ្យបានទូលំទូលាយ ដើម្បីឱ្យប្រជាពលរដ្ឋបានដឹងពីគ្រប់ព្រឹត្តិការណ៍ប្រកួតដ៏សំខាន់នេះ។
នៅក្នុងឱកាសនៃកិច្ចប្រជុំចែករំលែកបទពិសោធន៍ ក្នុងការរៀបចំការប្រកួតកីឡាអាស៊ីអាគ្នេយ៍លើកទី៣១ ដើម្បីត្រៀមរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះនាឆ្នាំខាងមុខ បានធ្វើឡើងនៅព្រឹកថ្ងៃទី១៤ ខែ មិថុនា ឆ្នាំ២០២២ ឯកឧត្តម ខៀវ កាញារីទ្ធ បានកោតសរ សើរចំពោះលទ្ធផលការងាររបស់ថ្នាក់ដឹកនាំ មន្រ្តីជំនាញបច្ចេកទេស តាមបណ្តាអគ្គនា យកដ្ឋានក្រោមឱវាទក្រសួង ព័ត៌មាន ដែលបានធ្វើការសិក្សាដកបទពិសោធន៍ ពីដំណើរការរៀបចំការប្រកួតកីឡាអាស៊ីអាគ្នេយ៍លើកទី ៣១ នៅប្រទសវៀតណាម ដើម្បីជាទុន និងចំណេះដឹង ក្នុងការត្រៀមរៀបចំប្រកួត ដែលកម្ពុជាធ្វើជាម្ចាស់ផ្ទះនាឆ្នាំ២០២៣។ ឯកឧត្តម រដ្ឋមន្រ្តី បានផ្តល់ជាមតិយោបល់ឱ្យប្រពន្ធ័ផ្សព្វផ្សាយ គឺធ្វើយ៉ាងណា ថតផ្សាយ រាល់គ្រប់វិញ្ញាសានៃការប្រកួតឱ្យបានទូលំទូលាយ ។ ទន្ទឹមគ្នានេះដែរ ប្រពន្ធ័ផ្សព្វផ្សាយ ក៏ត្រូវធ្វើការជូនដំណឹងជារៀង រាល់ព្រឹក មុនដំណើរការនៃការប្រកួតថា តើមានប្រភេទកីឡាអ្វីខ្លះ ដែលត្រូវប្រកួតនៅថ្ងៃនេះ ហើយផ្សាយតាមបណ្តាញប៉ុស្តិ៍ទូរទស្សន៍ណា ដើម្បីឱ្យសាធារណជន ងាយ ស្រួលតាមដាន ។ ឯកឧត្តមបន្ដថា អ្វីដែលសំខាន់នោះ គឺត្រូវមានកន្លែងស្តុកទុកឯកសារឱ្យបានត្រឹមត្រូវ បន្ទាប់ពីបានថត រួចរាល់ គ្រប់ទិដ្ឋភាព នៃកីឡាគ្រប់ប្រភេទ ។ អ្វីដែលសំខាន់ផងនោះ គឺការពិនិត្យលទ្ធភាពក្នុងការជ្រើសរើសក្រុមស្ម័គ្រចិត្តថតរូប សម្រាប់ចូលរួមថតពីព្រឹត្តិការណ៍កីឡាស៊ីហ្គេម លើកទី៣២ នៅកម្ពុជា។
ក្នុងឱកាសនោះដែរ ឯកឧត្តម ផុស សុវណ្ណ ប្រតិភូរាជរដ្ឋាភិ បាល ទទួលបន្ទុកជាអគ្គនា យក នៃអគ្គនាយកដ្ឋានព័ត៌ មាននិងសោតទស្សន៍ និងជាប្រធានគណៈកម្មការផ្សព្វ ផ្សាយ និងព័ត៌មាន បានធ្វើការបញ្ជាក់បន្ថែមថា ក្រសួងព័ត៌មាន មានតួនាទីសំខាន់និងចាំបាច់នៅក្នុងការរៀបចំនូវបណ្ដាញផ្សព្វ ផ្សាយស៊ីហ្គេមឆ្នាំ២០២៣ នេះ។
«តាមធម្មតាទម្រង់នៃការងារនេះយើងច្បាស់ជាមានការសហការហើយ ដោយសារយើងត្រូវការលក្ខណៈបច្ចេកទេសផ្សេងៗ យើងរៀបចំជាលើកទីមួយផង។ អ៊ីចឹងកន្លងទៅយោងតាមអនុសាសន៍របស់សម្ដេចនាយករដ្ឋមន្ត្រីលោកថា ឱ្យប្រព័ន្ធផ្សព្វផ្សាយនៅក្នុងស្រុករបស់យើងទាំងអស់អាចសហការគ្នាធ្វើការផ្សព្វផ្សាយឱ្យបានទូលំទូលាយអំពីកីឡា ក្រោមពាក្យស្លោកដែលយើងលើកឡើងថា យើងរស់នៅក្នុងកីឡា, កីឡានិងសន្តិភាព, កម្ពុជាទទួលបាននូវទីក្រុងស្អាតសម្រាប់ទទួលកីឡាជាដើម។ អ៊ីចឹងយើងគិតថាកម្មវិធីនេះគឺសំខាន់ដែលយើងត្រូវការសហការហើយអាចប្ដូរឥរិយាបថប្រជាពលរដ្ឋរបស់យើង ដើម្បីទទួលភ្ញៀវដែល គេចូលមើលកីឡា ដែលជាទេសចរណ៍ដែលធំបំផុតនៅក្នុងឆ្នាំ២០២៣នេះ»។
ឯកឧត្តម ផុស សុវណ្ណ បានបន្ថែមថា ដោយសារតែក្រសួងព័ត៌មាន មានមន្ត្រីជំនាញតិច ដូចនេះក្រសួង ក៏បានស្នើសុំឱ្យមានការចូលរួមពីមហាជន ដែលស្ម័គ្រចិត្ត មានជំនាញអាចធ្វើជាអ្នកបំពេញការងារបន្ថែម ជាមួយមន្ត្រីរបស់យើង ដើម្បីឱ្យដំណើរការប្រកួតនេះ ឱ្យបានរលូត៕ប្រភព÷ក្រសួងព័ត៏មាន AKP
