ភ្នំពេញ ៖ ក្រោយពីមានព័ត៌មានជាច្រើនបានផ្សព្វផ្សាយ អំពីទីតាំងសង្វៀនជល់មាន់ និង ល្បែងអាប៉ោងដ៏ធំមួយកន្លែង កំពុងតែលេងជុំគ្នាលេងយ៉ាងអានាធិបតេយ្យ ពេលនេះត្រូវបានកម្លាំងគណៈបញ្ជការឯកភាពខណ្ឌឬស្សីកែវ ដាក់កម្លាំងធ្មក់ចុះបង្ក្រាប ឃាត់ខ្លួនមនុស្សចំនួន៤នាក់ និងដកហូតមាន់ចំនួន ១៦ក្បាល សម្ភារៈល្បែងអាប៉ោង សម្ភារៈសម្រាប់ជល់មាន់ រថយន្តចំនួន០២គ្រឿង ម៉ូតូកង់បីឥណ្ឌា ចំនួន២គ្រឿង ម៉ូតូចំនួន ០៩គ្រឿង។
ក្នុងប្រតិបត្តិការនេះ បានចុះបញ្ជាផ្ទាល់ដោយលោក ឯក ឃុនដឿន អភិបាល នៃគណៈអភិបាលខណ្ឌឬស្សីកែវ ដឹកនាំកម្លាំងសមត្ថកិច្ចចុះឆ្មក់បង្ក្រាបទីតាំងសង្វៀនជល់មាន់ និងល្បែងស៊ីសងអាប៉ោង ធ្វើឡើងនៅវេលាម៉ោង៣និង២០នាទីរសៀលថ្ងៃទី១៤ ខែមិថុនា ឆ្នាំ២០២២ ស្ថិតនៅដីឡូ ផ្លូវ៩៨ ភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។
លោក ឯក ឃុនដឿន អភិបាលខណ្ឌបានឲ្យដឹងថា មុនឈានដល់ការចុះឆ្មក់បង្ក្រាបទីតាំងនេះបានសម្រេច ដោយទទួលបានសេចក្ដីរាយការណ៍ និងព័ត៌មានច្បាស់ការ រួចហើយបានចាត់កម្លាំងចុះច្បាមស្រាវជ្រាវ កំណត់ទីតាំងបាន ឡោមព័ន្ធចុះបង្ក្រាប់តែម្ដង។
លោកអភិបាល បានបញ្ជាក់ថា ក្រោយប្រតិបត្តិការទីតាំងរោងជល់មាន់នេះដែលធ្វើពីដែកប្រកស័ង្កសី គឺឲ្យកម្លាំងរុះរើចេញឲ្យអស់មិនឲ្យកើតមានឡើងវិញឡើយ។
ក្រោយពីធ្វើការបង្ក្រាបវត្ថុតាង និងអ្នកដែលញៀនល្បែងទាំងនោះត្រូវបានបញ្ជូនទៅអធិការនគរបាលខណ្ឌឬស្សីកែវ ដើម្បីចាត់ការតាមនីតិវិធីច្បាប់៕
