ខេត្តព្រះសីហនុ ៖ ប្ដីចិត្តអប្រិយសាហាវព្រៃខ្សៃម្នាក់ បានធ្វេីសកម្មភាពវាយប្រពន្ធរងរបួសធ្ងន់រលូតកូនក្នុងផ្ទៃ រហូតដល់ស្លាប់នៅស្រុកព្រៃនប់ ព្យាយាមរត់គេចខ្លួនបានពីរថ្ងៃ ក៏ត្រូវកម្លាំងសមត្ថកិច្ចនគរបាលជំនាញខេត្តព្រះសីហនុ ស្រាវជ្រាវរហូតឈានដល់ការឃាត់ខ្លួន យកមកដាក់ទោសតាមច្បាប់។ នេះបេីយោងតាមរបាយការណ៍របស់ស្នងការនគរបាលខេត្តព្រះសីហនុ ដែលទទួលបាននៅព្រឹកថ្ងៃសុក្រទី១៣ ខែឧសភា ឆ្នាំ២០២២។
យោងតាមរបាយការណ៍ដដែល បានបន្តថា កាលពីថ្ងៃទី១០ ខែឧសភា ឆ្នាំ២០២២វេលាម៉ោង១៧និង៣០នាទី នៅចំណុចភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ មានករណីហិង្សាដោយចេតនាមានស្ថានទម្ងន់ទោស ០១កើតឡើង បង្កដោយជនសង្ស័យម្នាក់ ឈ្មោះ យ៉ែម ចិន្តា ភេទប្រុស អាយុ ៤៣ឆ្នាំ មុខរបរ កម្មករដុតធ្យូង មានទីលំនៅចំនុចកើតហេតុខាងលើ បានធ្វើសកម្មភាពវាយទៅលើជនរងគ្រោះឈ្មោះ វុន វ៉ាន់ ភេទស្រីអាយុ ៣៦ឆ្នាំ (ត្រូវជាប្រពន្ធរបស់ខ្លួន) មុខរបរមេផ្ទះ មានទីលំនៅជាមួយគ្នា បណ្តាលឲ្យរងរបួសធ្ងន់រលូតកូនក្នុងផ្ទៃ និងបានស្លាប់នៅថ្ងៃ១១ ខែឧសភា ឆ្នាំ២០២២ វេលាម៉ោង១៥និង០០នាទី ក្រោយពេលបញ្ជូនទៅដល់មន្ទីរចំការចេកខេត្តព្រះសីហនុ ក្រោយពេលធ្វើសកម្មភាពរួចជនសង្ស័យបានរត់គេចខ្លួនបាត់តែម្តង ។
ប្រភពដដែលបន្តថា ក្រោយពេលកើតហេតុ កម្លាំងសមត្ថកិច្ចមិនបានទទួលពត៌មានទេ ដោយសារគ្មានអ្នកផ្តល់ពត៌មាន ព្រោះពេលកើតហេតុភ្លាមៗកូនៗរបស់ជនរងគ្រោះបានដឹកយកជនរងគ្រោះមកមណ្ឌលសុខភាពឃុំជើងគោ ហើយពេទ្យប្រចាំការបានឃើញជនរងគ្រោះមានសភាពធ្ងន់ធ្ងរក៏បានហៅរថយន្តសង្គ្រាះរបស់មណ្ឌលសុខភាពវាលរេញមកដឹកទៅមន្ទីពេទ្យចំការចេកខេត្តព្រះសីហនុតែម្តង ដោយពុំបានផ្តល់ពត៌មានដល់សមត្ថកិច្ចឡើយ ។
បន្ទាប់ពីទទួលបានពត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឱ្យកម្លាំងនៃអធិការដ្ឋាននគរបាលស្រុកព្រៃនប់ បានធ្វើការស្រាវជ្រាវយ៉ាងយកចិត្តទុកដាក់ ដោយបានសហការជាមួយការិយាល័យព្រហ្មទណ្ឌខេត្តព្រះសីហនុ កម្លាំងនាយកដ្ឋានព្រហ្មទណ្ឌ និងនគរបាលខេត្តកំពុងស្ពឺ ធ្វើការស្ទាក់ឃាត់ខ្លួនជនសង្ស័យខាងលើបាន នៅចំណុចលើដងផ្លូវជាតិលេខ៤ ត្រង់ភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ នាវេលាម៉ោង ១៧ និង ០៥ ថ្ងៃទី ១២ ខែឧសភា ឆ្នាំ២០២២ ខណៈពេលដែលជនសង្ស័យកំពុងជិះរថយន្តក្រុង ដើម្បីគេចខ្លួនទៅភ្នំពេញ ។
បច្ចុប្បន្នជនសង្ស័យកំពុងដឹកយកមកអធិការដ្ឋាននគរបាលស្រុកព្រៃនប់ ដើម្បីបំពេញនីតិវិធី និងចាត់ការតាមផ្លូវច្បាប់ ៕
