ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈបញ្ជាការឯកភាពរដ្ឋបាលខេត្ត បានបញ្ជាឲ្យមន្ត្រីពាក់ព័ន្ធ បន្តពង្រឹងវិធានការបង្ការទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបញ្ហាល្បែងស៊ីសង ក្មេងទំនើង ការជួញដូរមនុស្ស ឱ្យកាន់តែខ្លាំងក្លា ថែមទៀត ដោយយកចិត្តទុកដាក់ទប់ស្កាត់ និងបង្ក្រាបឱ្យមាន ប្រសិទ្ធភាពក្នុងសកម្មភាពជួញដូរពលករឆ្លងដែន និងចំណាកស្រុកខុសច្បាប់។
លោកបន្តថា ត្រូវបង្កើនការបង្ក្រាបបទល្មើសគ្រប់ប្រភេទដោយបង្កើនការដាក់កម្លាំងតាមគោលដៅ និងបង្កើនកម្លាំងល្បាត ដើម្បីធានាសន្តិសុខសុវត្ថិភាពជូនប្រជាពលរដ្ឋ។ បន្តពង្រឹងការអនុវត្តគោលនយោបាយភូមិ ឃុំ សង្កាត់មានសុវត្ថិភាព ការងារផ្សព្វផ្សាយ វេទិកាសាធារណៈ និងចលនា ប្រជាការពារឱ្យកាន់តែសកម្មផុលផុស និងត្រូវខិតខំជំរុញការផ្សព្វផ្សាយអប់រំទូលំទូលាយ នូវវិធានការបង្ការពន្លត់អគ្គីភ័យ ដល់គ្រប់ខ្នងផ្ទះប្រជាពលរដ្ឋ និងទីតាំងដែលងាយបង្កគ្រោះអគ្គីភ័យ ដោយជំរុញឱ្យមានការប្រុងប្រយ័ត្នខ្ពស់ ក្នុងការប្រើប្រាស់ចរន្តអគ្គិសនី ដើម្បីជៀសវាងនិងកាត់បន្ថយគ្រោះអគ្គីភ័យ ដែលអាចកើតមានឡើងជាយថាហេតុ ដោយធ្វើកម្មវិធីចុះផ្សព្វផ្សាយ ទីតាំងសំខាន់ៗទាំងនោះជាប្រចាំ។
លោកថា ការពង្រឹង និងបង្កើនកិច្ចសហប្រតិបត្តិការគ្រប់អង្គភាព ស្ថាប័នមានសមត្ថកិច្ចពាក់ព័ន្ធ ដើម្បីបង្ការទប់ស្កាត់ការទន្ទ្រានដីព្រៃជលផល តំបន់ការពារ និងធនធានធម្មជាតិ ដែលស្ថិតក្នុងតំបន់អភិរក្ស ព្រមទាំងបន្តទប់ស្កាត់ដោះស្រាយវិវាទ តវ៉ានានារបស់ប្រជាពលរដ្ឋឱ្យបានទាន់ពេលវេលាដោយសន្តិវិធី និងបន្តទប់ស្កាត់បង្ក្រាបបទល្មើសនេសាទ ក្នុងតំបន់បឹងទន្លេសាប ក្នុងភូមិសាស្ត្រខេត្តបាត់ដំបងផងដែរ។
លោកសុខ លូ ក៏បានធ្វើការក្រើនរម្លឹកដល់រដ្ឋបាលក្រុង ស្រុក និងសមត្ថកិច្ចពាក់ព័ន្ធ ត្រូវបន្តការផ្សព្វផ្សាយផលប៉ះពាល់នៃគ្រឿងញៀន ដល់គ្រប់ស្រទាប់ប្រជាជន នៅតាមសហគមន៍ក្នុងខេត្ត ដើម្បីទប់ស្កាត់ការប្រើប្រាស់ និងជួញដូរគ្រឿងញៀន ខណៈការជួញដូរ ចែកចាយ រក្សាទុក និងការប្រើប្រាស់គ្រឿងញៀននៅតែជាបញ្ហាប្រឈម ដែលត្រូវប្រយុទ្ធប្រឆាំងឱ្យបានម៉ឺងម៉ាត់បំផុត។
អភិបាលខេត្តបាត់ដំបងរូបនេះ ក៏បានធ្វើការជំរុញឱ្យរដ្ឋបាលក្រុង ស្រុក ឃុំ សង្កាត់នៃខេត្តបាត់ដំបង ត្រូវរួមសហការគ្នាល្អជាមួយសមត្ថកិច្ចពាក់ព័ន្ធបន្តសកម្មភាពចុះអប់រំផ្សព្វផ្សាយ ផលប៉ះពាល់នៃការប្រើប្រាស់គ្រឿងញៀន ឱ្យដល់ប្រជាជនគ្រប់ស្រទាប់វណ្ណៈ នៅតាមសហគមន៍នានា ដើម្បីឱ្យពួកគាត់មានការយល់ដឹងកាន់តែស៊ីជម្រៅអំពីផលប៉ះពាល់នៃគ្រឿងញៀន ក្នុងគោលដៅ ដើម្បីឈានទៅបញ្ឈប់ការប្រើប្រាស់គ្រឿងញៀន ក្នុងនោះត្រូវតាមដានស្វែងរកមេក្លោងជួញដូរ ចែកចាយគ្រឿងញឿន ដើម្បីយកមកផ្តន្ទាទោសទៅតាមផ្លូវច្បាប់។
អភិបាលខេត្តបាត់ដំបងមានប្រសាសន៍បែបនេះ ក្នុងឱកាស បើកកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបង កាលពីថ្ងៃពុធ ទី១០ ខែកក្កដា ឆ្នាំ២០២៤៕
