ក្នុងពិធីប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី៧ ក្រុមនិស្សិតផ្នែកវិស្វកម្មអគ្គិសនី បានអំពាវនាវដល់យុវជន ងាកមកចាប់អារម្មណ៍រៀនជំនាញវិជ្ជាជីវៈ និងបច្ចេកទេស ព្រោះជាជំនាញដែលកំពុងមានទីផ្សារ និងតម្រូវការខ្ពស់ពីបណ្តាក្រុមហ៊ុន រោងចក្រទៅថ្ងៃខាងមុខ។
យុវជន ហៃ សុភ័ក្រ្ត និស្សិតឆ្នាំទី២ ជំនាញវិស្វកម្មអគ្គិសនី នៅវិទ្យាស្ថានអភិវឌ្ឍន៍ជំនាញកម្ពុជា-ថៃ បានឲ្យព័ត៌មាន ប៊ីធីវី ដឹងថា មូលហេតុចាប់យកជំនាញអគ្គិសនី ដោយសារចំណង់ចំណូលចិត្តផង និងដោយសារប្រទេសកម្ពុជាកំពុងមានតម្រូវការ និងរីកចម្រើនលើវិស័យថាមពលអគ្គិសនីនេះខ្លាំងផង ដែលធ្វើឱ្យទីផ្សារការងារមានកង្វះកម្លាំងធនធានមនុស្សមានជំនាញច្រើន។ យុវជនរូបនេះ បានឲ្យដឹងទៀតថា ក្រោយពីបញ្ចប់ការសិក្សារបស់និស្សិតលើបរិញ្ញាបត្ររង និងបរិញ្ញាបត្រ ពួកគាត់មានទទួលបានឱកាសការងារធ្វើច្រើន និងមានប្រាក់ខែសមរម្យផងដែរ។
