លោក ហ្សង ពុទ្ធា អ្នកនាំពាក្យ គ.ជ.ប បានគូសបញ្ជាក់ថា ដំណើរការបោះឆ្នោតព្រឹទ្ធសភានីតិកាលទី៥ នៅព្រឹកថ្ងៃទី២៥ខែកុម្ភៈ ប្រព្រឹត្តទៅដោយរលូនពោលគឺគ្មានឧបសគ្គឬអំពើហិង្សាអ្វីកើតឡើងទេ។
លោក ហ្សង ពុទ្ធា បានអះអាងទៀតថា ស្ថានភាពជារួមអំឡុងពេលបោះឆ្នោតនិងអំឡុងពេលរាប់សន្លឹកឆ្នោតមានភាពល្អប្រសើរ។ ល្អប្រសើរនៅត្រង់ថា អង្គបោះឆ្នោតបំពេញតួនាទីត្រឹមត្រូវនិងមានភាពចាស់ទុំផ្នែកនយោបាយ ហើយអាជ្ញាធរក៏បំពេញតួនាទីបានល្អប្រសើរក្នុងការថែរក្សាសុខសុវត្ថិភាពជូនអង្គបោះឆ្នោតទាំងអស់គ្នាសរុប១១,៧៤៧នាក់។ អង្គបោះឆ្នោត១១,៧៤៧នាក់នេះជាអ្នកតំណាងរាស្ត្រនៅក្នុងតំណែងនិងក្រុមប្រឹក្សាឃុំសង្កាត់នៅក្នុងតំណែង។
លោក ហ្សង ពុទ្ធា ចាត់ទុកដំណើរការបោះឆ្នោតនៅក្នុងអាណត្តិទី៥ កាន់តែមានភាពល្អប្រសើរបើធៀប៤អាណត្តិមុន ហើយអង្គបោះឆ្នោតកាន់តែមានភាពចាស់ទុំ យកចិត្តទុកដាក់ និងមានភាពសស្រាក់សស្រាំក្នុងការទៅបោះឆ្នោត។
ការបោះឆ្នោតព្រឹទ្ធសភានីតិកាលទី៥មានការិយាល័យចំនួន៣៣និង៨មណ្ឌល។ ការបោះឆ្នោតព្រឹទ្ធសភានេះ មានគណបក្ស៤ ចូលរួមប្រកួតប្រជែងគ្នា ក្នុងនោះគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សភ្លើងទៀន និងគណបក្សកម្លាំងជាតិ។
យោងតាមលទ្ធផលបឋម នៃការបោះឆ្នោតជ្រើសតាំងសមាជិកព្រឹទ្ធសភា ថ្ងៃទី២៥ ខែកុម្ភៈ ឆ្នាំ២០២៤ បានបង្ហាញថា គណបក្សប្រជាជនកម្ពុជាឈ្នះបានអាសនៈច្រើនលើសលប់ ដោយទទួលបាន៥៥អាសនៈ ខណៈគណបក្សឆន្ទៈខ្មែរ ទទួលបាន ៣ អាសនៈ ចំណែកគណបក្សហ៊្វុនស៊ិនប៉ិច និងគណបក្សកម្លាំងជាតិ មិនទទួលបានអាសនៈ នោះទេ៕
