រាជធានីភ្នំពេញ ៖ នៅរសៀលថ្ងៃទី១៩ ខែកញ្ញា ឆ្នាំ២០២៣ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសមេតុងទីនរូបស្រល់ម្នាក់ ដាក់ពន្ធនាគារកំណត់ ៣ឆ្នាំកន្លះ និងសងសំណងដើមបណ្តឹងរដ្ឋប្បវេណីជាង ៣០ដុល្លារអាមេរិក និងជំងឺចិត្ត ៣០លានរៀល ដែលមាន២សំណុំរឿងសុទ្ធតែចេញស្អែកស្អុយ ។
សាលក្រមបានប្រកាសឡើងជាសាធារណៈ ដោយលោក ពេជ្រ វិជ្ជាធរ អនុប្រធានសាលាដំបូង ជាចៅក្រមជំនុំជម្រះសាលាដំបូងរាជធានីភ្នំពេញ និងលោក វង្ស សាវ៉ាត ព្រះរាជអាជ្ញារង ជាតំណាងអយ្យការ ។
សាលក្រមបានប្រកាសចំពោះមុខជន ជាប់ចោទឈ្មោះ អឿន ម៉ូលីកា ភេទស្រី អាយុ២៧ឆ្នាំ មុខរបរ ជាមេតុងទីន លើសំណុំរឿងចំនួន២ បទល្មើស ៖
សំណុំរឿងទី១. សាលក្រមបានផ្តន្ទទោសជនជាប់ចោទឈ្មោះ អឿន ម៉ូលីកា ដាក់ពន្ធនាគារកំណត់២ឆ្នាំ បង្គាប់ឲ្យសងសំណងទៅបណ្តឹងរដ្ឋប្បវេណីចំនួន ៣០ម៉ឺនដុល្លារអាមេរិក និងជំងឺចិត្តចំនួន ២០លានរៀល ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន (ចេញសែកស្អុយ) ។
សំណុំរឿងទី២. សាលក្រមបានផ្តន្ទាទោសជនជាប់ចោទឈ្មោះ អឿន ម៉ូលីកា ដាក់ពន្ធនាគារកំណត់ ១៨ខែ សងសំណងទៅបណ្តឹងរដ្ឋប្បវេណីចំនួន ៦,៥០០ដុល្លារអាមេរិក និងជំងឺចិត្តចំនួន ១០លានរៀល ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន (ចេញសែកស្អុយ) ដូចគ្នា ។
សូមរម្លឹកថា កាលពីថ្ងៃទី១៨ ខែធ្នូ ឆ្នាំ២០២២ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចចេញដីកាឃុំខ្លួនមេតុងទីនឈ្មោះ អឿន ម៉ូលីកា ដាក់ពន្ធនាគារ(ម២)ព្រៃ.ស ជាបណ្ដោះអាសន្ន ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន ដោយចេញសែកស្អុយ លើទឹប្រាក់ប្រមាណ ៧០ម៉ឺនដុល្លារអាមេរិក ប្រព្រឹត្តនៅរាជធានីភ្នំពេញ ។
ជនសង្ស័យ ត្រូវបានកម្លាំងកងរាជអាវុធហត្ថរាជធានីភ្នំពេញ ឃាត់ខ្លួនកាលពីថ្ងៃទី១៤ ខែធ្នូ ឆ្នាំ២០២២ តាមដីកាបញ្ជាឲ្យចូលខ្លួនរបស់ស្ថាប័នអយ្យការអមសាលាដំបូងរាជធានីភ្នំពេញ ដើម្បីយកទៅសាកសួរលើបណ្តឹងព្រហ្មទណ្ឌ ។
បន្ទាប់ពីតំណាងអយ្យការបើកការស៊ើបសួររួចមក មេតុងទីនរូបស្រស់នោះ ត្រូវបានចោទប្រកាន់ជាផ្លូវការ ហើយសំណុំរឿងបានចាត់បញ្ជូនទៅចៅក្រមស៊ើបសួរ ទើបចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ។
ជនត្រូវចោទមានឈ្មោះ អឿន ម៉ូលីកា ភេទស្រី អាយុ២៧ឆ្នាំ មុខរបរជា អ្នករកស៊ី ស្នាក់នៅផ្ទះលេខ១០ ផ្លូវលេខ បុរីវ៉ារីណា សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ត្រូវបានតំណាងអយ្យការចោទប្រកាន់ ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន តាមបញ្ញត្តិមាត្រា២៣១ នៃច្បាប់ ស្តីពីឧបករណ៍អាចជួញដូរបាន និងប្រតិបត្តិការទូរទាត់ប្រាក់ ៕
