ប្រជាពលរដ្ឋបានផ្ញើសារគោរពជូនអតីរដ្ឋមន្ត្រីក្រសួងព័ត៌មាន បច្ចុប្បន្នជាអ្នកតំណាងរាស្ត្រមណ្ឌលខេត្តកំពង់ចាម ឯកឧត្តម ខៀវ កាញារីទ្ធ ដោយបានលើកឡើងថា ជាការពិតខ្ញុំមិនចង់រំខានឯកឧត្តមចំពោះរឿងនេះទេ ប៉ុន្តែខ្ញុំពិចារណាចុះឡើងច្រើនសារទេីបដាច់ចិត្តផ្ញើសារនេះជូនទៅឯកឧត្ដមក្រោមហេតុផល២៖ *ទី១-.ឯកឧត្ដមជាអ្នកតំណាងរាស្ត្រមណ្ឌលកំពង់ចាម ហើយសាច់រឿងនេះក៏ជាអ្នកកំពង់ចាម។ និង*ទូ២.ការផុសរបស់ឯកឧត្តមមានការគាំទ្រច្រើនពីប្រជាពលរដ្ឋ ព្រោះឯកឧត្តមតែងតែជួយឈឺឆ្អាលដល់ប្រជាពលរដ្ឋទូទៅដែលជួបរឿងអយុត្តិធម៌។
ប្រភពបន្តថា ខ្ញុំសូមជម្រាបជូនឯកឧត្តមមេត្តាជ្រាបថា៖ បុរសម្នាក់នេះ ឈ្មោះ ស៊ិន សែ ជាប្រជាពលរដ្ឋរស់នៅភូមិផ្ទះកណ្ដាលក្រោម ឃុំផ្ទះកណ្ដាល ស្រុកស្រីសន្ធរ ខេត្តកំពង់ចាម ។ គាត់ជាជនមានពិការភាពខ្វេរខ្វង់ដៃ និងជេីងតាំងពីកុមារភាព ពិបាកក្នុងការធ្វើដំណើរទៅណាមកណា ថែមទាំងមានជំងឺប្រចាំកាយដោយឧស្សាហ៍ប្រកាច់ ត្រូវប្រេីប្រាស់ថ្នាំប្រចាំថ្ងៃ ហេីយបច្ចុប្បន្ននេះ មានជំងឺផ្សេងៗទៀតកំពុងរួមរឹតរូបគាត់ទៀតផង។
បច្ចុប្បន្នគាត់រស់នៅជាមួយបងស្រីដែលមានរបរត្រឹមជាអ្នកជួយលាងចានឆ្នាំងតាមរោងបុណ្យ ឬរោងការ និងមួយចំណែកបានការចែករំលែកពីប្អូនៗដែលជាកម្មការិនីរោងចក្រ ដូច្នេះសបញ្ជាក់ថាជីវភាពរបស់គាត់មិនមានលំនឹងល្អទេ។
ប្រជាពលេដ្ឋបានបន្តទៀតថា អ្វីដែលខ្ញុំបាទចង់ជម្រាបជូនឯកឧត្តមជ្រាបនោះគឺថាគាត់ត្រូវបានអាជ្ញាធរដែនដីមេីលរំលង ដោយគាត់មិនទទួលបានការគាំទ្រពីកម្មវិធីសុខុមាលភាពសង្គមរបស់រាជរដ្ឋាភិបាលតាមរយៈការផ្ដល់ឲ្យនូវបណ្ណក្រីក្រ ឬអ្វីផ្សេងទៀតដែលអាចឱ្យគាត់ទទួលបានសេវាថែទាំសុខភាពដោយមិនបង់ថ្លៃជាដើម ក្នុងខណៈដែលគាត់មានពិការភាពមិនអាចទៅប្រកបកិច្ចការងារចិញ្ចឹមជីវិតដោយខ្លួនឯងបាន និងមានជំងឺប្រចាំកាយទៀតផង។ ករណីគាត់ពុំទទួលបានបណ្ណក្រីក្រ ប្រហែលជាអាជ្ញាធរសំឡឹងឃើញគាត់រស់នៅលេីផ្ទះឈេីខ្ពស់ផុតពីដីដែលជា កេរ្ត៍ដំណែលពីឪពុកម្ដាយរបស់គាត់ក៏ថាបាន ហើយក៏គិតថាគាត់មានជីវភាពសមរម្យមិនសមនឹងទទួលបានការគាំទ្រណាមួយពីរាជរដ្ឋាភិបាល។
ប្រភពដដែលបានឲ្យដឹងទៀតថា បច្ចុប្បន្ននេះ គាត់កំពុងរួមរឹតដោយសភាពហេីមរាង្គកាយ និងកំពុងតែសំរាកព្យាបាលនៅភ្នំពេញ ហេីយបងប្អូនអស់លទ្ធភាពក្នុងការរកប្រាក់បង់ថ្លៃព្យាបាលបន្តទៀតហើយ ទេីបខ្ញុំដាច់ចិត្តផ្ញើសារនេះទៅឯកឧត្ដម ដេីម្បីជាការពញ្ញាក់ដល់អាជ្ញាធរ ក្រែងលោគាត់អាចទទួលបានបណ្ណ និងទទួលបានការព្យាបាលដោយមិនបង់ប្រាក់ពីមន្ទីរពេទ្យរដ្ឋ។
ជាមួយនោះ ប្រជាពលរដ្ឋបានបន្ថែមថា ហេតុដូចនេះ សូមឯកឧត្តមមេត្តាពិនិត្យលទ្ធភាពធ្វើយ៉ាងណាឱ្យគាត់ទទួលបានបណ្ណសម្រាប់ប្រេីប្រាស់ក្នុងការគាំពារសុខភាពដោយក្ដីអនុគ្រោះ។ ឯកឧត្តមអាចសាកសួរព័ត៌មានបន្ថែមពីអ្នករស់នៅភូមិផ្ទះកណ្ដាល នីម្ដុំវត្តផ្ទះកណ្ដាល ពីលោក ស៊ិន សែ ថា ពិតដូចជាការរៀបរាប់របស់ខ្ញុំដែរឬទេ ព្រោះជាភូមិ នៅតាមផ្លូវដែលឯកឧត្តមតែងឆ្លងកាត់ទៅកោះសូទិន៕
