ភ្នំពេញ ៖ បើតាមការបញ្ជាក់ពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា បានថ្លែងឱ្យដឹងនៅថ្ងៃសៅរ៍ទី០១ ខែតុលា ឆ្នាំ២០២២នេះថា៖ មនុស្សប្រុស ស្រី១៣៨នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាល និងកម្លាំងការិយាល័យប្រឆាំងគ្រឿងញៀន នៃស្នងការនគរបាលរាជធានីភ្នំពេញ បានចុះស្រាវជ្រាវ និងឡោមព័ទ្ធទីតាំងក្លឹបកម្សាន្តយីហោ” ML “ ដែលជាប់ពាក់ព័ន្ធនឹងការលេងល្បែងស៊ីសងខុសច្បាប់, ការប្រើប្រាស់សារធាតុញៀន និងការប្រើប្រាស់អាវុធខុសច្បាប់ កាលពីយប់រំលងអធ្រាត្រឈានចូលថ្ងៃទី០១ ខែតុលា ឆ្នាំ២០២២ ស្ថិតតាមបណ្ដោយផ្លូវ១០៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
លោកអ្នកនាំពាក្យរូបនេះ បានថ្លែងបញ្ជាក់ទៀតថា៖ «យប់មិញពិតជាមានករណីបង្ក្រាបក្លឹប ML ប្រហែលជាម៉ោង ១រំលងអធ្រាត្រជាង ដែលអនុវត្តតាមបទបញ្ជា និងការណែនាំរបស់លោកឧត្តមសេនីយ៍ឯក ស ថេត អគ្គស្នងស្នងការរង និងជាស្នងការនគរបាលរាជធានីភ្នំពេញ ការិយាល័យប្រឆាំងគ្រឿងញៀន នៃស្នងការដ្ឋាននគរបាល សហការជាមួយកម្លាំងការិយាល័យព្រហ្មទណ្ឌកម្រិតស្រាល និងការិយាល័យអន្តរាគមន៍ យើងបានធ្វើការចុះស្រាវជ្រាវ ឈានដល់ការបង្ក្រាប ហើយឃាត់ខ្លួនមនុស្សជាង១០០នាក់ កំពុងបន្តនីតិវិធី»។
លោកវរសេនីយ៍ឯក សុខ សីហា បានគូសបញ្ជាក់បន្ថែមទៀតថា៖ «ក្លឹប ML នេះ គឺមានការពាក់ព័ន្ធការលេងល្បែងស៉ីសង ប្រើប្រាស់សារធាតុញៀន និងមានការប្រើប្រាស់កាំភ្លើងខុសច្បាប់ អីឡូវនេះខាងជំនាញកំពុងធ្វើការងារនេះ ដើម្បីបន្តនីតិវិធី»។
បច្ចុប្បន្នមនុស្សប្រុសស្រីចំនួន ១៣៨នាក់នេះ កំពុងឃាត់ខ្លួនបណ្ដោះអាសន្ននៅស្នងការដ្ឋាននគរបាលរាជធានីភ្នំពេញ ដើម្បីអនុវត្តតាមនីតិវិធីច្បាប់។
គួររម្លឹកថា បន្ទាប់ពីសម្ដេចតេជោ ហ៊ុន សែន នាយករដ្ឋមន្ដ្រីកម្ពុជា ដាក់ចេញនូវវិធានការយ៉ាងម៉ឺងម៉ាត់ឱ្យមន្ដ្រីថ្នាក់ក្រោមជាតិចូលរួមបង្ក្រាបទប់ស្កាត់រាល់បទល្មើស ល្បែងស៊ីសងគ្រឿងញៀន និងអំពើអបាយមុខផ្សេងៗរួចមកបានសង្កេតឃើញថា អាជ្ញាធរគ្រប់បណ្ដារាជធានីខេត្ត បានដាក់កម្លាំងជំនាញចុះបង្ក្រាបទីតាំងបនល្បែងខុសច្បាប់គ្រប់ប្រភេទ និងបានឃាត់ខ្លួនមនុស្សប្រុសស្រីរាប់សិបនាក់ បញ្ជូនទៅតុលាការចាត់ការតាមច្បាប់ផងដែរ៕
